Qırımtatar medeniy-tarihiy miras müzeyinde Halqara bala kitabı künü qayd etildi. Bu yerde «Fidançıq» bala inkişafı klubı ve «Filis» bala vokal studiyasınıñ iştirakçileri, ana-babalar ve ocalar toplaştı. Tedbirniñ hususiy musafiri olğan bala şairesi Elmaz Bahşış «Masal saati» leyhası çerçivesinde balalarnı qırımtatar masal alemine seyahatqa davet etti. Kenceler içün bunıñ kibi de kitap sergisi, eglenceli viktorina ve muzıkalı programma teşkil etildi.
