Qarasuvbazar – Aqmescit yolundan keçken er bir insannıñ diqqatını kök camnen süslengen beyaz minareli cami celp eter. Bu – Yañı Burulça köyüniñ camisidir. Onıñ tarihı qırımtatarlarnıñ vatanğa qaytuv tarihınen sıqı bağlıdır, 90-ncı yıllardan başlap yerli sakinler cami binasını qurıp, abadanlaştırmaqtalar. Cami artıq köyniñ tek diniy degil, medeniy ayatınıñ merkezine çevirildi.