«Qaradeniz production» studiyası «CANLI SES 2020-2021» beşinci yubiley gala kontsertine azırlana. Bu yılı 20 finalcı «CANLI SES 2020-2021» istidat yarışınıñ eñ yahşı oyuncı ve eñ yahşı yırcı unvanı içün küreşecek. Azırlıq endi başlandı. Balalar ve olarnıñ ustazlarını mürekkep bir yol bekley, amma olar jüri eyyetini istidatı ve ğalebege ıntıluvlarınen şaşırmaq niyetindeler.
«CANLI SES» gala kontserti – bu, balalar er yılı sabırsızlıqnen beklegen medeniy vaqiadır. Yarışnıñ teşkilâtçıları — «Qaradeniz production» studiyası keçken bazar künü «Sarabuz» kompleksinde gala-kontsertniñ repetitsiyasını keçirdiler. Tedbir ta 2020 senesiniñ soñuna planlaştırılğan edi, amma koronavirus pandemiyası buña keder etti.
