Aqmescitte Amethan Sultan adına 1-nci sport mektebinde sambo boyunca üçünci turnir keçirildi. Bu sefer yarış ekinci dünya cenkiniñ qaramanı, Aqmescitteki eñ büyük gizli teşkilâtnıñ yetekçisi Abdulla Dağcınıñ hatırasına bağışlandı. Yarışta Qırımnıñ çeşit yerlerinden kelgen 70 bala iştirak etti. Turnirniñ tantanalı açılışında musafirler ve iştirakçilerge qaramannıñ arbiy yararlıqları aqqında ikâye ettiler. Teşkilâtçılar bu yarışlarnı er yılı keçirmek niyetindeler.
