Şeryan Ali eñ mahsuldar zemaneviy qırımtatar şairlerinden biridir. O, edebiyatqa sürgünlik devirinde kirip keldi. Üçünci sınıfta oqur eken «Men mektepni sağındım» degen ilk şiirini yazıp, bir daa qalemini elinden tüşürmedi. Yazmağa ögrenmek mümkün degil, çünki edebiyat – bu Yaradannnıñ bahşışıdır, dep saya Şeryan ağa. Bu sözlerniñ eñ yahşı isbatı — şairniñ samimiy, teren, felsefiy şiirleridir.
