Sürgünlik yerlerinde qırımtatarlarnıñ ruhunı kötergen, ilham, küç-taqat bergen çoqraq ve bayram – bu toylar edi. Toylar ve toy ustaları, çalğıcılar sayesinde muzıkamıznı saqlap qaldıq. Çalğıcılar arasında öyle bir ustalar bar edi ki, qırımtatar toylarını milliy avalar bayramına çevire ediler. Şulardan biri – Muqsim Bekirovdır. Mahsus muzıka tasili almağan bu insan doğma istidat saibidir.
