O, Macaristan ve İsveçre universitetlerinde ders berdi, türk tillerniñ yazısını arapçadan latin urufatına keçirüv ceryanına yetekçilik yaptı, birinci qırımtatar tili ilmiy sarfınıñ müellifi oldı. Alim ve şair Bekir Çoban-zade özünden soñ tilşınaslıq ve edebiyat boyunca 100-den ziyade ilmiy maqale, çoqtan-çoq şiir ve ikâyeler qaldırdı. Onıñ mirası daa da büyük olur edi, eger 1937 senesi oktâbr 13 künü idam etilmegen olsa. O, 44 yaşında edi. Bekir Çoban-zade «burjua milletçiliginde» qabaatlanıp, qurşunğa tizildi.
