Tibbiyat ilimleri doktorı, Vernadskiy adına Qırım federal universiteti Georgiyevskiy adına Tibbiyat akademiyası Yuqunçlı hastalıqlar kafedrasınıñ professorı Muniver Ğafarova özüniñ «Aqdeñiz sıtması» serlevalı ilmiy-tedqiqat işini taqdim etti. 1996 senesinden berli alime insan içün telükeli infektsiyalarnı qozğayıcılarnı tedqiq ete. Er yılı o, studentlerinen beraber Qırımnıñ çeşit yerlerinde araştırma işleri içün qasartqılarnı cıya. Neticede qasartqılarnıñ içinde daa çoqtan-çoq üceyreiçi parazitlerni ve Borrelia miymotoi yañı çeşitini belgilemek mümkün oldı. Tedqiqatnıñ neticeleri dünya alimlerini meraqlandırdı ve dünya malümatlar bazasına kirsetildi.
