80-nci yıllarnıñ soñlarında qırımtatarlar toplu şekilde Vatanğa qaytıp, temel atmağa başlağanda Mazanka köyünde yerleşken Lütfiye Qadirova qırımtatar «Adet» halq bala teatrini teşkil ete. Bütün ömürini şu taqımnıñ inkişafına bağışlap, bir sıra istidatlı artistlerni yetiştirdi. Çeşit festival ve yarışlarğa davet etilgen «Adet»niñ iştirakçileri qırımtatar medeniyetini munasip şekilde temsil ettiler. Kollektiv pek qısqa vaqıtta halq unvanına nail oldı, Lütfiye-hanım ise Qırımda nam qazanğan medeniyet hadimi oldı. 75 yaşında Lütfiye Qadirova 2023 s. başında vefat etti.
