62 yaşında Leylâ İbragimovanıñ zenaatı biolog. Amma 40 yıl evelsi o, dama oyunınen meraqlanıp başladı. Çoq yıllardan berli öz bilgi ve tecribesinen Aqmescitteki Eşref Şemi-zade adına mektep talebelerinen paylaşmaqta. Noyabr ayınıñ başında Leylâ hanım Türkiyeniñ Alanya şeerinde 29 ülkeden kelgen sportçılar iştiraki ile keçirilgen dama oyunı boyunca dünya çempionatınıñ ğalibi oldı. Leylâ İbragimova raqiplerini artta qaldırıp, Qırımğa çempion unvanında qayttı.
