Bağçasaraylı Eftade Seytumerova zenaatı boyunca interyer ve landşaft dizayneridir. Amma, taa studentlik çağında diger ustalarnıñ işlerinden ilhamlanıp barelyefnen meraqlanıp başladı. Bu tehnika Eftade hanımnı öyle bir tesirlendirgen ki, o mına endi 10 yıldan berli bu yönelişte çalışıp, ustalığını ep mükemmelleştirmekte. Qırım onıñ baş ilhamcısıdır. Ustanıñ er bir işinde Qırımğa bitmez-tükenmez sevgi, qırımtatar halqınıñ tarihı ve medeniyetine sayğısı açıq aksini tapa.
