Mürvet Altınel Bulğaristanda dünyağa keldi, şimdi Türkiyede yaşay, göñlü ise, Qırımnen bağlı. Onıñ ecdatları Qırımdan 19-ncı asırda Bulğaristanğa icret etmege mecbur oldılar. Anda qoranta bir sıra meşaqatlardan keçti, kommunistik ükümeti bütün mal-mülkni aldı, qoranta başı ise apis etilgen edi. Bir şeyge baqmadan, ailede ecdatlarnıñ Qırımdan alıp ketirgen eşyalarnı saqladılar. 2014 s. bu eşyalar Qırımğa ketirildi ve Bağçasarayda sergilendi.