Arpat köyünde qartanağa ne deyler? Ya da Keriç yarımadası zengin olğan neftke anda ne degenlerini bilesiñmi? Bilmege isteseñiz, bu işte sizge «Armançıq» bala mecmuası azırlağan yañı «Tuvğan tilniñ baylığı» medialeyhası yardımcı olur. Mecmua kollektivi kiçkene qaramanlar ile birlikte qırımtatar tiliniñ şivelerini, çeşit köy sakinleriniñ qonuşmalarını yazıp almaq maqsadında Qırım boylap ekpeditsiyağa çıqtılar. Bu işniñ neticesinde Uskut, Arpat, Taraqtaş, bunıñ kibi de Keriç ve Bağçasaray şiveleri aqqında 5 videofilm azırlandı.
