İnsanlıq tarihında cenk meydanlarından fotoreportajlar ilk kere Qırım cenki vaqtında(1853 – 1856) yapılğan. Endekler, gemiler, askerler, lagerler, Balıqlava – bütün bularnı biz bugün ingliz Rocer Fentonnıñ fotoresimlerinde köremiz. Amma cenkte bivasta iştirak etken ressamlarnıñ subyektiv baqışı da meraqlıdır. Böyle ressamlardan biri Britaniya ordusınıñ polkovnigi (soñra general) Corc Kadogan (1814 – 1880) asker adından sızılğan suvlu boya türkümini yarattı. Bazıda deşetli, bazıda duyğulı , bazıda külünçli eserler 1980 senesi neşir etilgen «Cadogan’s Crimea» albomında yer aldı.
