Bizim içün Qırım küneşli, bahıtlı ve tuvğandır. Amma ingliz tilli ülkelerniñ medeniyetinde yarımadamız suvuq, sisli ve merhametsiz bir yer olaraq tariflene. Sebebi – Qırım cenki, insanlıq tarihında birinci ve kütleviy haber vastalarında keniş aydınlatılğan, inglizlerniñ hatırasında 1854 senesi britan atlılarınıñ facialı ücüminen saqlanıp qalğan muarebedir. Bu vaqiadan 6 aftadan soñ Alfred Tennison yazğan «Yengil brigada ücümi» şiiri Britaniya mekteplerinde alâ bugün ögrenilip kelmekte. O vaqialar aqqında şiirler, kitaplar yazıldı, filmler çekildi. XX asırnıñ ortalarından soñ olar rok muzıkada yañıdan yañğıradı. Şulardan bazı eserler aqqında bizim levhamızda.
