Bugün öz doğğan kününi professor, filologiya ilimleri doktorı Adile Emirova qayd ete. Adile oca, anasını üç balasınen Qırımdan sürgün etkenlerinde, daa endi 11 yaşında edi. Olarnı stantsiyalarnıñ birisinde babası qıdırıp taptı. Olar Dalverzin sovhozına tüştiler. Sürgünlikniñ birinci aylarında suvuq ve açlıqtan çekişip açıq avada yaşamaq zoruna qaldılar. Böyle qıyınlıqlarğa baqmadan Adile hanım balalıqtan bilgige ıntılğan. Bütün ömürini ilimge bağışlağan qadın bugünde-bugün belli bir alimdir. 1990 senesi o, babasınıñ büyük arzusını yerine ketirdi – babasınen Vatanğa qayttı.
