Anası üç balanen 1944 mayısında tuvğan Qarasuvbazarındaki öz evinden quvulğanda Bilâl İlyasov 10 yaşında edi. İftira sebebinden yaqalanğan babası tap 1937 senesi Uzaq Şarqqa sürgün etilgen. Balalarınıñ canını qurtarmaq peşinde anası er angi işke azır olğan. Amma eñ kiçigini qurtarıp olamağan. Hastalıq yeñgen. 1947 senesi babası olarnı tapıp kelgen soñ yaşayış biraz yoluna mingen. Amma vatan asretligi iç bir daqqağa tınmağan. 1978 senesi yasaq ve zorluqlarğa baqmadan Bilâl İlyasov Qırımğa, tuvğan Qarasuvbazarına qaytıp keldi.