Al-azırda Qırımda ava pek cıllı, tamam qadife mevsimi. Qırım kurort ve turizm nazirliginiñ bergen malümatlarına köre 2020 senesiniñ sentâbr ayında yarımadağa keçken seneniñ şu ayına nisbeten 40 fayız ziyade insan raatlanmağa kelgen. Tatilge kelgenlerni atta koronavirus pandemiyası toqtatmay. Amma bundan aman-aman 100 yıl evelsi ise öyle bir adise yüz bergen ki, Qırımnı tek kelgenler degil de, yerli sakinler bile terk etmege mecbur olğanlar «Krımskiy jurnal» yazğanına köre o eñ boş qadife mevsimi olğan eken.
