Qırımnı ziyaret etken bir çoq tarihçılar ve seyaatçılar ecdatlarımıznıñ musafirçenligini qayd etkenler. O zamanlarda adamlar musafir qarşılamağa, em de tek uzaqtan kelgen musafirlernen degil de, qomşularınen de subetleşmege pek sevgenler. Buña qomşu qırımtatar azbarlarını bir-birine bağlağan qomşu qapusı şaatlıq ete. Böyle qapular bir vaqıtları Qırım qasabaları ve köylerinde, hususan Bağçasaray, Kezlev, Kefede pek çoq rastkelgen. Meselâ, Bağçasarayda bu qomşu qapulardan bütün şeerni, iç bir vaqıt soqaqqa çıqmayıp, keçmek mümkün edi, çünki bir azbarda çoq vaqıt tek bir degil, bir qaç qomşu qapusı olğan.