Qırımtatarlarnıñ ananeviy örnegi insaniyetniñ maddiy olmağan medeniy mirasınıñ qısmı oldı. Dekabrniñ ortasında ÜNESKO komissiyası örnekni temsiliy cedvelge kirsetti. Bu qısqa qarar artında ise Ukraina Tış işler nazirligi ve Medeniyet nazirligi, Esma Aciyevanıñ reberligindeki «Alem» cemaat teşkilâtı ve belli ressam, etnograf, «Qırım üslübi» leyhasınıñ yolbaşçısı Mamut Çurlunıñ yapqan qocaman işi tura. Mamut ağa endi 30 yıldan berli qırımtatar örneklerini ögrenip, öz bilgilerinen şegirtleri ile paylaşa. Bunıñ sayesinde örnek saqlanıp qaldı ve inkişaf ete.