«Aluştadan esken yelçik yüzüme urdı. Balalığım keçken evge közlerim tüşti…» Qırımtatarlarnıñ özüne has ekinci gimni olğan «Güzel Qırım» türküsiniñ bu satırlarını er kes bile. Sürgünlikte bu türküsiz bir toy, cıyın, kontsert ve toplaşuv keçmegendir. Bir çoqları bu türküni halq yırı, dep belley. «Güzel Qırım» türküsini 1968 senesi fotomuhbir, jurnalistler birliginiñ azası Şükri Osmanov yazdı, dep aytalar onıñ soy-sopları. Vatanğa qaytqan soñ Şükri Osmanov defalarca öz müellifligini isbatlamağa tırışıp, atta yırnıñ peyda oluv tarihı aqqında ikâye yazdı. Amma er sefer oña, bu halq yırı, dediler ve bazı çalğıcılar müellif olğanlarını iddia ettiler.
