1978 senesiniñ iyün ayında qırımtatar halqınıñ vatanğa qaytuvınıñ tarihında eñ facialı adiselerden biri yüz berdi. İyün 23 künü Beş Terek köyüniñ sakini Musa Mamut vatanında yaşamaqnı yasaq etken, qorantasını sıqıştırğan akimlerge qarşı isyan eterek öz özüni yaqtı. Yanıqlardan Musa Mamut 1978 senesi iyün 28-de hastahanede vefat etti. Bu adise pek büyük seslenüvlerniñ sebepçisi oldı. Cemaatçılıq, uquqqoruyıcılar ve dissidentler qırımtatar halqı meselesiniñ çezilmesine diqqat talap ettiler.