Tahminen 650 biñ adam sürgün etildi, yükseklikteki bazı köyler sakinlerinen beraber yoq etildi – 1944 senesi fevral 23 künü sovet akimiyeti Çeçen-İnğuş Muhtar Sovet Sotsialist Cumhuriyetinden, em de diger yaşağan yerlerinden çeçen ve inğuşlarnı sürgün etti. İşğalcilernen işbirlikte, sovetlerge qarşı faaliyette, aydutlıqta qabaatlanıp, olarnı Qazaqstan, Qırğızstan, şu cümleden Özbekistan ve Tacikstanğa zorbalıqnen köçürdiler. Çeşit malümatlarğa köre, sürgünlik vaqtında ve sürgünlikniñ birinci yıllarında tahminen 150 biñ adam elâk olğan.