Qırımtatar müzeyinde belli qırımtatar bestekârı Yağya Şerfedinovnıñ 130 yıllığına bağışlanğan hatıra tedbiriniñ iştirakçileri bestekârnıñ qırımtatar sanatınıñ inkişafına qoşqan salmaqlı issesi, folklorcı olaraq halq avaları ve türkülerini toplav boyunca faaliyeti aqqında ayttılar. Bunıñ kibi de onıñ ressam ve çalğıcılıq istidatını da ayrıca qayd ettiler ve hatırlavlarınen paylaştılar. İcadiy aqşamnı «Qırım» ve «Haytarma» ansambliniñ artistleri çıqışlarınen yaraştırdılar.
