Qırımtatar teatriniñ sahnasında sanki bütün halq yırladı. Milletniñ sevimli yırcısı Dilâver Osmanov 70 yaşını toldurdı! Öz yubileyini yırcı, folklor toplayıcısı ve 50-den ziyade yırnıñ müellifi «Ayt deseñiz aytayım, bilgenden soñ…» degen kontsert ile qayd etti. Onıñ halq yırlarınıñ ikmetini taşığan sesi bu aqşam ayrıca gür oldı. Dilâver Osmanov halq arasında «çöl bülbuli» unvanını qazandı. Çünki çoqları içün telâffuz bile etmesi zor olğan noğay beyitlerini tek o, böyle ustalıqnen icra ete!