«Zaman zaman ekende…»— bu sözlernen eñ eyecanlı ikâyeler başlana. «Armançıq» balalar mecmuasınıñ muarrirleri tarafından neşir etilgen kitap endi dünya yüzüni kördi. Cıyıntıqta tek ikmetli qırımtatar halq masalları degil de, özgün eserler, em de dünyanıñ çeşit köşelerindeki eñ yahşı masallar da kirsetilgen. Canlı resimler kitapqa ayrıca dülberlik qoşa. Ressam Zera Akimova güzel iş yaptı: er bir resimde saifelerde tarihı canlanğan insanlarnıñ tekrarlanmaz çizgileri, kündelik ayatı, renkleri tasvirlengen.