Eskender Fazıl – milletperver şair

Dekabr 6 künü belli qırımtatar yazıcı Eskender Fazıl dünyağa keldi. Bu insannıñ ömürinden tek bir levha onıñ kim olğanını tarif eter. 1948 senesi 14 yaşında ekende ölüm töşeginde yatqan babası içün öz quyularından suv alıp kelmek içün komendant nezaretinden gizli qaçıp, Özbekistandan Qırımğa kele. Qorantasını baqmaq içün traktorcı, yükleyici olıp çalışa ve aynı zamanda Vatanı, mazlum halqı aqqında şiirler yaza. Eskender Fazıl — şair, yazıcı, milliy areket iştirakçisidir.