Aqmescitte «Qırımtatar milliy sportınıñ tiklenüvi ve «Quşaq küreşi» kitabınıñ taqdimi olıp keçti. Cıyıntıqta qırımtatar quşaq küreşiniñ tarihı, emiyeti, tehnikiy taraflarını qaplap alğan ilmiy ve meraqlı maqaleler bir yerge toplanğan. Oña yıllar devamında yapılğan araştırmalardan ve arhiv fotoresimler, tapılğan malümatlar da kirsetilgen. Neşir Qırımtatar filologiyası, Qırım etnoslarınıñ tarihı ve medeniyeti ilmiy-tedqiqat institutı (Fevzi Yakubov adına Qırım müendislik ve pedagogika universitetinde) ve «Quşaq küreşi» milliy sport federatsiyası işbirliginiñ neticesidir. Kitapnı Seydamet Yağyayev ve Nadir Bekirov tertip ettiler.