Aqmescit yanındaki Fontanı qasabasında «Sanat miras olaraq» adlı sergi açıldı—»Granat» sanat akademiyası işte böyle adden tış şekilde taqdim etildi. Sergi musafirlerni Capparovlar qorantasınıñ üç nesiliniñ işlerinen tanıştırdı. Akademiya öz faaliyetini tahminen bir yıl evelsi başlap, ilk olaraq vokal ögretüv ve muzıka aletlerini çalmağa ögretüvge esas diqqat ayırdı. Lâkin şimdi talebelerniñ akademiyanıñ horeografiyası ve tasviriy sanat studiyaları vastasınen öz istidatlarını ve hususiyligini keşf etmek ve ifade etmek imkânı da olacaq.