Ayder Halilovnıñ «Zolaman» müzeyinde «Sevimli Qırım» sergisi açıldı

Keçken raatlıq künlerinde Ayder Halilovnıñ «Zolaman» müzeyinde «Sevimli Qırım» sergisi açıldı. Onda «Çatır dağ» icadiy birleşmesiniñ azaları Mamut Çurlu, Eldar Güsenov, Refat Qurtveliyev, Ediye Mustafayeva, Emin Taymazov, Yuliya Tulupova, Yekaterina Çörnayanıñ fırçısına ait eserler taqdim etildi. Müzeyniñ divarlarını istidatlı ressamlar, ameliy-tasviriy sanat ustalarınıñ 30-dan ziyade eseri yaraştırdı. Er bir eserde Qırımğa, qırımtatarlarğa, olarnıñ medeniyeti ve turmuşına sevgi ifade etilgen. «Sevimli Qırım» sergisi «Zolaman» müzeyinde noyabrniñ 29-na qadar devam etecek.